Sinopsis
Nel llibru Cien histories y cuentos de Villaviciosa y Cabranes resúmese’l trabayu de cuarenta años engazando cuentos de tresmisión oral, que guardaben persones básicamente mayores. El 95 % d’eses persones yá fallecieron, queda namás el so recuerdu y, sicasí, los cuentos qu’aínda contaben.
Persones diverses que s’afayaben nel pasamentu y nun querín que s’escaeciere aquel encantu escondíu na memoria borrinosa de los años; o les nueches inacabables de lluces estrañes nos montes arbolaos; muyeres centenaries que recordaben con una lluminosidá imborrable: «Esto díxomelo mio padre»; paisanos que se criaron al pie de los muriécanos insondables d’un castru celta; la güela que vivía cabu’l llar de la vida.
Ehí queda’l recuerdu del paisano sordu y qu’un día recobró l’audición; el criáu que nun quixo que desapaeciere la so xera semblando la tierra del amu; o la muyer que yá nunca saldrá retratada xunta los xeranios de so casa, pero que sabía dibuxar como naide los topónimos floríos de la redolada.
Más libros del autor
