Sinopsis
Hamasei urterekin, zaldunen bilera batera joan zen Artur. Hantxe
zegoen ezpata ospetsu bat, ingude batean sarturik, eta ingudea
harkaitz batean. Eskalibur zen ezpataren izena. Zaldun guztiak
saiatu ziren Eskalibur ezpata ateratzen; izan ere, elezaharrak
zioenez, ezpata hura ateratzen zuen zalduna Bretainia Handiko
errege bihurtuko zen, eta bere agintepean bilduko zituen erresuma
txiki guztiak. Zaldun asko ahalegindu ziren ezpata hura ateratzen,
baina alferrik. Artur ere saiatu zen: esku batez heldu, eta
harriaren bihotzetik atera zuen ezpata, gora jaso, eta une hartantxe
bilakatu zen zuzentasunaren zerbitzari ibiltzen ziren zaldunen
buru, bera artean zaldun izan gabe. Orduan, denen buru eta errege
izendatu zuten, eta zin egin zuen zuzentasunaren alde borrokatuko
zela, eta gizaki guztiak babestuko zituela, berdin aberatsak
nahiz behartsuak. Zuzentasunaren zerbitzari zebiltzan zaldunen
jaunak hamabi ziren, eta mahai biribil baten inguruan biltzen
ziren, Artur buru zutela, Kamelot gazteluan.
Artur erregeak Ginebra hartu zuen emazte, Bretainia Handiko
printzesarik ederrena. Ginebraren bila Lancelot zalduna bidali
zuen Arturrek, Kamelotera ekar zezan. Bidean, Lancelot eta Ginebra
maitemindu egin ziren, eta bien arteko maitasun ezkutuak tragediaren
bidea hartuko zuen.
Más libros del autor
