Sinopsis
Un estranxeru llega a Burgundu trayendo les primeres noticies de la Revolución Francesa. Pero’l verdaderu frutu d’esta visita va ser una rapaza que va tener que convivir colos misterios tanto de la Historia como colos del so propiu pasáu personal. Habitante d’un mundiu y un tiempu onde cuasi nadie ye inocente, la rapaza vese obligada a sobrevivir nun universu onde lo real s’entemez colo máxico.
«D’una güeyada supo María la Francesa que maldá tala nun podía ser obra de llobos nin menos d’osos, porque los animales, aún siendo besties ensin entendimientu como son, saben qu’hai males y bones maneres de matar, y María abrazóse al cuerpu del probe animal, que nunca-y ficiera dañu a naide, y por eso mesmo llorólu como merecía, y llueu siguió camín de Burgundina ciega de tristura, y ellí tampoco nun esperaba topar lo que topó, porque nin taben la Galana y menos el gochu y les pites, y abiertu y vacíu taba l’horru, y ardiendo siguía per dientro la casa, que siguía siéndolo namás por ser de piedra la muria. Y viendo María la Francesa qu’ellí nun había otra cosa de facer que siguir llorando sobre les cenices y sobre los muertos, y qu’eso de nada valía, miró primero qué más pudiera salvar pa llevalo arriba con ella, pero vio que quien viniera con intenciones dañines bien sabía lo que garrar y lo que non, y nada topó María la Francesa que-y valiera, polo que salió de Burgundina pensado que yera pa siempre enxamás, y empobinó camín de la campa de San Xuan».
II Premiu de Novela Curtia «Andrés Solar Santurio» [Coedición col Conceyu de Xixón]
Más libros del autor
