Sinopsis
L’armada del gobernador Ovando zarpa de Sevilla nel añu 1502. A bordu d’una de les naos más importantes viaxa’l cacique Caonabo, a quien toos daben por muertu, y una serie más de personaxes de toa triba que bien pronto van vese na necesidá de sobrevivir a la travesía pel Mare Tenebrarum, llugar que maxinen enllenu de misterios y peligros.
El viaxe del cacique ye una novela histórica, d’aventures, con dellos elementos de los llibros de caballeríes, que mos fala d’un de los momentos más sorprendentes de la historia del ser humanu.
«Esi otru día avistaron una nublina que talamente paecía como si nesi llugar del horizonte durmieren toles nubes del cielu. Y por mala suerte empecipió a soplar l’aire nesi momentu y emburrió cola Trinidá hasta que la fizo entrar nesa nube. Esti borrín que va nada la tripulación miraba dende proba ensin poder estremar lo qu’escondía acullá, quedó agora tan xuncío a la nao que foi tan parte d’ella como les rates y los pioyos lo yeren de la bodega. Quedaben los cuerpos arrodiaos como pol fumu d’un fueu que venía de dientro mesmo de la mar. Entamó tamién la nublina a esguilar pelos palos y el velame y llegó hasta la gavia. Nun pudiendo lluchar contra un animal que de la mesma naturaleza ye que del misteriu y los suaños, siguió la nao navegando llevando l’ancla a pendura y preparada pa lo que pudiera ser, y socedió que cuando a la fin salió la nao d’esi llaberintu onde entrara tanto pola fuercia del aire como pola mesma de l’azar, vio que taba sola na mar Océana y que navegaba agora como oveya escabarriada y que perdiera, en fin, de vista la armada del gobernador Ovando».
Premiu Xosefa Xovellanos de Novela 2022 [Coedición col Gobiernu del Principáu d’Asturies]
Más libros del autor
